സെബാസ്റ്റ്യന്റെ ചോദ്യത്തിന് മറുപടിയായി അർജുന്റെ മനസ്സിൽ ആദ്യം വന്നത് ഒരു പരിഹാസച്ചിരിയാണ്. അവൻ സ്വയം ചിന്തിച്ചു: “ഇത്രയധികം ശരീരം പ്രദർശിപ്പിക്കുന്ന ഒരു വേഷം ധരിച്ച് പൊതുസ്ഥലത്ത് നിൽക്കുമ്പോൾ, ചുറ്റുമുള്ള കൗമാരക്കാരുടെ കണ്ണുകൾ അവിടെ ഉടക്കുന്നത് സ്വാഭാവികമല്ലേ? അവരെ മാത്രം കുറ്റം പറഞ്ഞിട്ട് എന്ത് കാര്യം?”
ലിൻഡ ആവേശത്തോടെ തന്റെ ഫോണിലെ ഗാലറി ഓരോന്നായി കാണിച്ചു കൊണ്ടിരുന്നു. “ഞങ്ങളുടെ ഫ്രണ്ട്സിന്റെ ഏതാനും കല്യാണങ്ങൾ ഉണ്ടായിരുന്നു. അപ്പോൾ എടുത്ത ഫോട്ടോസ് ആണ് ഇത്,” അഭിമാനത്തോടെ അവർ പറഞ്ഞു. “എവിടെ ആയാലും എന്റെ മോൾ തന്നെ നമ്പർ വൺ. എല്ലാവരുടെയും ശ്രദ്ധ എപ്പോഴും അവളിലേക്കാണ്. എന്താണാവോ അങ്ങനെ?”
ലിൻഡ ചിരിച്ചുകൊണ്ട് ആ കല്യാണ ഫോട്ടോകൾ അർജുനും മീരയ്ക്കും നേരെ നീട്ടി. റിയയുടെ കല്യാണ വിരുന്നിന് മകൾ ധരിച്ച വേഷങ്ങൾ കണ്ടതും അർജുന്റെയും മീരയുടെയും കണ്ണ് തള്ളിപ്പോയി.
നെഞ്ചിന്റെ ഭാഗവും പിന്നെ അരക്കെട്ടും ഒഴിച്ച് ബാക്കിയെല്ലാം തുറന്ന് വെച്ചുള്ള വ്യത്യസ്തമായ ഡ്രസുകൾ. കല്യാണ വിരുന്നുപോലെ ഒരു ചടങ്ങിൽ ഇത്രയധികം ശരീരം തുറന്നുകാട്ടുന്ന വേഷം ധരിച്ചു നിൽക്കുന്ന അവളെ കണ്ടപ്പോൾ അർജുന്റെ ഉള്ളിൽ ഒരു മറുപടി മിന്നിമറഞ്ഞു: “ഇങ്ങനെയൊരു വേഷം കെട്ടി വന്നാൽ പിന്നെ എല്ലാവരുടെയും ശ്രദ്ധ അവളിലേക്ക് നീളുന്നതിൽ എന്ത് അത്ഭുതമാണുള്ളത്? പിന്നെങ്ങനെ പയ്യന്മാർ തുറിച്ചു നോക്കാതിരിക്കും?”
ലിൻഡയും സെബാസ്റ്റ്യനും ആവേശത്തോടെ ഓരോ ഫോട്ടോകളായി കാണിച്ചുകൊണ്ടിരുന്നു. ആ കൂട്ടത്തിൽ, ഇത്രയും ചെറിയ ഡ്രസ്സ് ഇട്ടു നിൽക്കുന്ന റിയയെ നാലു ചെറുക്കന്മാർ പൊക്കിപ്പിടിച്ചു നിൽക്കുന്ന ഫോട്ടോ കണ്ടപ്പോൾ അർജുനും മീരയും സ്തബ്ധരായിപ്പോയി.
