ആ വഴിയിൽ മെഹർ കൈപിടിച്ച് മുന്നോട്ട് കൊണ്ടുപോകുന്നു.
പിന്നിൽ ലക്ഷ്മിയുടെ വാശിയുള്ള നോട്ടം.
ഒരു വശത്ത് എയ്ഞ്ചലിന്റെ മൃദുവായ പുഞ്ചിരി.
മറ്റൊരു കോണിൽ ആർദ്രയുടെ ജാഗ്രതയുള്ള കണ്ണുകൾ.
എന്തോ വലിയ ഒന്ന് വരാനിരിക്കുകയാണെന്ന് മനുവിന്റെ ഉള്ളിൽ ഒരു സൂചന ഉണ്ടായിരുന്നു.
അത് അപകടമാണോ…
ആനന്ദമാണോ…
അല്ലെങ്കിൽ രണ്ടും കൂടിച്ചേർന്നൊരു വഴിത്തിരിവാണോ…
അവന് അറിയില്ലായിരുന്നു.
പക്ഷേ ഒരു കാര്യം ഉറപ്പായിരുന്നു ഇനി ആരും പഴയപോലെ ആകാൻ പോകുന്നില്ല.
———————————
രാവിലെ ഉറക്കം ഉണർന്ന ഉടനെ ലക്ഷ്മി അവൾ സാധാരണയായി ചെയ്യുന്ന പോലെ ഫോൺ എടുത്ത് നോക്കി
അത് അവളുടെ പതിവായിരുന്നു. പ്രത്യേകിച്ച്, ഫോട്ടോ സ്റ്റാറ്റസ് ഇട്ട ദിവസങ്ങളിൽ.
സ്റ്റാറ്റസിന് എത്ര ലൈക്ക് കിട്ടി..
ആരൊക്കെ റിയാക്റ് ചെയ്തു…
ആരൊക്കെ കമന്റ് അയച്ചു…
ആരൊക്കെ വെറുതെ കണ്ടിട്ട് പോയി…
അതെല്ലാം നോക്കുന്നതിൽ അവൾക്ക് ഒരു പ്രത്യേക രസം ഉണ്ടായിരുന്നു. കാരണം, അങ്ങനെയൊരു ഫോട്ടോ ഇടുന്നത് തന്നെ ആരെങ്കിലും കാണാൻ വേണ്ടിയല്ലേ…?
ആരുടെയെങ്കിലും കണ്ണ് ഒരു നിമിഷം തനിക്കു മേൽ നിൽക്കാൻ വേണ്ടിയല്ലേ…?
അവൾ സ്റ്റാറ്റസ് വ്യൂവേർസ് ലിസ്റ്റ് തുറന്നു.
ആദ്യം പരിചിതമായ പേരുകൾ…
ക്ലാസ്സിലെ കുട്ടികൾ…
ചില സീനിയേഴ്സ്…
ചില പഴയ ഫ്രണ്ട്സ്…
പതിവ് പോലെ കുറച്ച് lലൈക്സ്, ചില ഫയർ ഇമോജി, രണ്ട് മൂന്ന് കമന്റ്സ്…..
അവൾ അതൊക്കെ സാധാരണ പുഞ്ചിരിയോടെ നോക്കി കൊണ്ടിരിക്കുകയായിരുന്നു.
