ഹൃദയം പൊട്ടി ഞാൻ അവളോട് ചോദിച്ചു. എന്റെ കണ്ണുകൾ നിറഞ്ഞിരുന്നു.
“ആ ചേച്ചി ചെയ്ത തെറ്റിന് ഏട്ടൻ എന്തിനാ സ്വയം പഴിചാരുന്നത്? മേലാൽ ഇങ്ങനെ സ്വയം കുറ്റപ്പെടുത്തരുത്, എനിക്കത് കേൾക്കാൻ വയ്യ.”
വേണിയുടെ വാക്കുകൾക്ക് ഒരു പ്രത്യേക കരുത്തുണ്ടായിരുന്നു. ആ നിലാവെളിച്ചത്തിൽ അവളുടെ ആ ഉണ്ടക്കണ്ണുകളും സൗന്ദര്യവും ഒന്ന് കൂടി ശോഭിക്കുന്നത് പോലെ എനിക്ക് തോന്നി. ഞാൻ പതുക്കെ കുളത്തിലെ തണുത്ത വെള്ളത്തിലേക്ക് മുങ്ങി. ആ തണുപ്പ് എന്റെ തലയിലെ ലഹരിയെ പതുക്കെ മായ്ച്ചു കളയുന്നത് പോലെ തോന്നി.
“നീ എന്താ വേണി ഈ പാതിരാത്രിയിൽ ഇങ്ങനെ ഒരുങ്ങി നിൽക്കുന്നത്?”
വെള്ളത്തിൽ നിന്നും തലയുയർത്തി ഞാൻ ചോദിച്ചു.
“അതൊന്നുമില്ല ഏട്ടാ… അച്ഛൻ ഇന്ന് ഈ രാത്രി എന്നെ ഒരുത്തനെക്കൊണ്ട് പെണ്ണ് കാണിക്കാൻ കൊണ്ടുവന്നു. അതിന് വേണ്ടി നിർബന്ധിച്ച് ഒരുക്കിയതാ.”
അവൾ താല്പര്യമില്ലാതെ പറഞ്ഞു.
“എന്നിട്ട് എന്തായി?”
“എനിക്ക് അവനെ ഇഷ്ടപ്പെട്ടില്ല, ഞാൻ വേണ്ടെന്ന് പറഞ്ഞു. അതിന്റെ പേരിൽ അച്ഛൻ വഴക്കിട്ടാണ് കിടന്നുറങ്ങിയത്.”
“അതെന്താ നിനക്ക് ഇഷ്ടപ്പെടാഞ്ഞത്? നല്ല ആലോചന ആയിരുന്നില്ലേ?”
അതുകേട്ടതും അവൾ ദേഷ്യത്തോടെ എന്നെ നോക്കി.
“എന്താ? നല്ല ബന്ധം ആണെന്ന് വച്ച് ഇഷ്ടപ്പെടണോ…?”
അവളുടെ ആ മറുപടിയിൽ കൂടുതൽ ചോദ്യങ്ങൾക്കൊന്നും എനിക്ക് ധൈര്യമില്ലായിരുന്നു.
