“എനിക്കാണ് ഏറ്റവും താത്പര്യമെന്ന് നീ കരുതുന്നുണ്ടോ,?
നീ മറ്റൊരാളിലേക്കു പോകുന്നത് കാണാൻ എനിക്ക് എളുപ്പമാണെന്ന് തോന്നുന്നുണ്ടോ ?
നിന്റെ ഒരു നോട്ടം പോലും ഞാൻ സ്വന്തമാക്കാൻ ആഗ്രഹിക്കുന്നവളാണ് ഞാൻ. പക്ഷേ ഞാൻ നിന്നെ സ്നേഹിക്കുന്നത് എന്റെ ആവശ്യം മാത്രം നോക്കിയല്ല.”
മനുവിന്റെ കോപം പതിയെ മങ്ങി.
അവൻ വേദനയോടെ ചോദിച്ചു.
“അപ്പോൾ നീ എന്നെ ഒഴിവാക്കുകയാണോ?”
“ഇല്ലടാ…”
ആ “ടാ”യിൽ മെഹറിന്റെ സ്നേഹം പൊട്ടി പുറത്തുവന്നു.
“ഒഴിവാക്കാൻ ആണെങ്കിൽ ഞാൻ നിന്നെ ഇങ്ങനെ പിടിച്ചു നിർത്തുമോ?
ഇന്നലെ രാത്രി നിന്നെ കാണാൻ ഞാൻ വിളിക്കുമായിരുന്നോ?
നിന്റെ ശബ്ദം കേൾക്കാതെ ഒരു ദിവസം പോലും എനിക്ക് കഴിയും എന്ന് നിനക്കു തോന്നുന്നുണ്ടോ?”
മനുവിന്റെ ശ്വാസം പതുക്കെ മാറി.
“എനിക്ക് നിന്നെ വേണം മനു…”
അവൾ പറഞ്ഞു.
“ഇത് പറയുമ്പോഴും എനിക്ക് നിന്നെ വേണം. അതാണ് എനിക്ക് ഏറ്റവും വേദന. നിന്നെ ഞാൻ വിട്ടുകളയാൻ തയ്യാറല്ല…
പക്ഷേ നിന്നെ ഞാൻ നശിപ്പിക്കാനും തയ്യാറല്ല.”
“നീ പറയുന്നത് കേൾക്കുമ്പോൾ… ഞാൻ നിന്നെ സ്നേഹിച്ചതെല്ലാം എനിക്ക് വേണ്ടി മാത്രമാണെന്ന് തോന്നുന്നു.”
“അല്ല…”
മെഹർ ഉടനെ പറഞ്ഞു.
“നിന്റെ സ്നേഹമാണ് എനിക്ക് ഇപ്പോൾ ജീവിക്കാൻ ഉള്ള കാരണം.
പക്ഷേ അതേ സ്നേഹം നിന്റെ ജീവിതത്തിന് ശിക്ഷ ആകുമോ എന്ന പേടിയാണ് എനിക്ക്.”
ഫോണിന്റെ ഇരുവശത്തും നിശ്ശബ്ദത പടർന്നു.
മനു ഒടുവിൽ മന്ദമായി പറഞ്ഞു.
“എന്റെ മനസ് വല്ലാതെ നീറുകയാണ്.”
