എന്നെ നോക്കി ചിരിക്കുന്നവൾക്ക് നേരെ എന്റെ കണ്ണ് രണ്ടും ഉരുട്ടി ഒരു ഒന്നൊന്നര നോട്ടം ഞാൻ പാസാക്കി. ഒന്ന് പേടിപ്പിക്കാൻ നോക്കിയതാണ്… എവിടെ! അവൾക്ക് യാതൊരു കുലുക്കവുമില്ല. കൂടുതൽ നിന്നാൽ ചിലപ്പോ എന്റെ ബാക്കി ചോര കൂടി അവൾ ഉറിഞ്ചിക്കുടിക്കുമോ എന്ന് പേടിച്ച് ഞാൻ വേഗം കയ്യിലിരുന്ന കോഫി അവിടെയുള്ള ടേബിളിൽ വെച്ചിട്ട്, ഒട്ടും ഗമ കുറയാതെ തന്നെ കുളിക്കാൻ ബാത്റൂമിലേക്ക് കയറി.
ഷവർ തുറന്ന് ആ തണുത്ത വെള്ളം തലയിലേക്ക് വീണപ്പോൾ എന്റെ ഓർമ്മകൾ വീണ്ടും ഇന്നലത്തെ ആ സ്വപ്നങ്ങളിലേക്ക് പോയി. കല്യാണം കഴിഞ്ഞ്, ആദ്യരാത്രിയിൽ അവളുമൊത്ത് ജീവിക്കാൻ ഞാൻ കണ്ടു കൂട്ടിയ സ്വപ്നങ്ങൾ… മണിയറ… റോസാപ്പൂവ്… പാൽഗ്ലാസ്… അതോർത്തപ്പോൾ എന്റെ മുഖത്ത് വലിയൊരു പരിഹാസച്ചിരി വിടർന്നു. ജീവിതം പട്ടി നക്കി എന്നൊക്കെ ആളുകൾ പറയുന്നത് കേട്ടിട്ടുണ്ട്… പട്ടി നക്കിയാൽ കുഴപ്പമില്ല, പക്ഷേ എന്റെ ജീവിതം ഇതിപ്പോ എന്താണ് നക്കിയതെന്ന് എനിക്ക് ഇപ്പോഴും മനസ്സിലാകുന്നില്ലല്ലോ!
ഒരു യക്ഷിയല്ലേ വന്ന് എന്റെ കഴുത്തിൽ കടിച്ചു തൂങ്ങിയത്!
അങ്ങനെയൊക്കെ ആലോചിച്ച് നിന്ന് കുളിയും കഴിഞ്ഞ്, അവളുടെ മുന്നിൽ വെച്ച് ഡ്രസ്സ് മാറാൻ ധൈര്യമില്ലാത്തതുകൊണ്ട് ബാത്റൂമിൽ വെച്ചുതന്നെ ഷർട്ടും മുണ്ടും മാറ്റി ഞാൻ പുറത്തേക്കിറങ്ങി.
അപ്പോഴാണ് ബെഡിലിരിക്കുന്ന അവളെ ഞാൻ കണ്ടത്. ആ സാരിയൊക്കെ അവൾ ശരീരത്തിൽ നിന്ന് എടുത്തു മാറ്റിയിരുന്നു. ഇപ്പോൾ വെറുമൊരു വെള്ളനിറത്തിലുള്ള ബ്ലൗസിലും ഒരു വെളുത്ത അടിപ്പാവാടയിലുമാണ് ഇരിപ്പ്. കയ്യിൽ ഫോണുണ്ട്. അപ്പുറത്ത് ആരോടോ ഭയങ്കരമായി ചൂടാവുകയാണവൾ….
